Após de térmonos movilizado en numerosas ocasións demandando un servizo ferroviario adecuado ao século en que vivimos, o BNG de Pontedeume ven de apresentar unha moción para o impulso e modernacización do Ferrocarril na nosa comarca e na Galiza.

O ferrocarril é un servizo público básico, sustentábel economicamente, que constitúe un elemento de cohesión e vertebración social, ademais de ser un factor de dinamización e equilibrio demográfico. Como medio de transporte é o elemento central dun sistema nacional de transporte intermodal e complementario, resulta o máis eficiente no que atinxe ao transporte de granel e mercadorías non perecedoiras, respectuoso co medio ambiente, e ademais fonte dun emprego de calidade.

Os recortes de Renfe Media Distancia, a eliminación da maior parte das estacións e apeadeiros da Galiza, a negativa dun servizo de proximidades ou o proceso de privatización e liberalización de infraestruturas, material e servizos, leva ao sector ferroviario galego a unha situación dramática, de desmantelamento de servizos e infraestruturas.

Mentres no Estado, nos últimos quince anos, levouse a termo a modernización ferroviaria, na Galiza adíanse os investimentos necesarios e négaselle unha rede compatíbel para persoas viaxeiras e mercadorías, unha dupla vía e electrificada, que prime a mobilidade interior, con conexións axeitadas con Portugal e co resto do Estado. O Goberno Central ignora, á mantenta, que Galiza posúe aproximadamente a metade dos núcleos de poboación do Estado, mentres carece de servizos ferroviarios de proximidade.

As consecuencias desa política ferroviaria do Estado van ser moi graves para A Coruña- Pontedeume-Ferrol cunha infraestrutura de hai cen anos, e onde se pretenden eliminar servizos, dos cinco actuais a dous.

Máis todos imos perder:

Para Vigo-Ourense, e as poboacións intermedias, polo Miño, que será de mercadorías desde o porto de Vigo, e onde se eliminarán servizos de media distancia, como o tren de Ponferrada que agora chega ás 2 da tarde.

A liña A Coruña-Lugo-Monforte, que quedará con servizos de longa distancia a Madrid e Barcelona, mais coa posibilidade de perder un dos dous de media distancia que ten.

Monforte-O Barco de Valdeorras que seguirá só cos trens de longa distancia (Madrid e Barcelona ou Euskadi), mentres non rematen o AVE Ourense-Puebla da Seabra.

E o ramal Santiago-Ourense que é o troncal do AVE cando remate de facerse no 2018 e, en consecuencia, a liña convencional Santiago-Ourense quedará morta, pois a duración da viaxe será de dúas horas, cando no AVANT será de 30 minutos, quedando ademais O Carballiño fóra.

Por todo isto, solicitamos para Pontedeume do Pleno da Corporación municipal a adopción do seguinte ACORDO:

Instar á Xunta de Galiza a

1. 1.      Reclamar do Goberno do Estado que desista deste proceso de desmantelamento e privatización de servizos ferroviarios no noso país, reclamando o mantemento das liñas existentes (Ourense-Puebla da Seabra; Ourense-Monforte-Ponferrada; A Coruña-Ferrol; A Coruña-Lugo-Monforte, Vigo-Ourense) e unha mellora dos servizos e frecuencias que se veñen prestando en territorio galego.
2. 2.      Demandar do Estado as transferencias en materia de ferrocarril interior, xunto cun financiamento axeitado, co obxectivo de crear unha compañía pública ferroviaria galega que mellore a prestación deste servizo no noso país e permita acometer as infraestruturas e desenvolver os servizos de transporte ferroviario na Galiza que contribúan a vertebración económica, social e territorial do país.